معلومات على الماشي

 معلومات على الماشي 

- لو عندك بيض بقاله مده في التلاجة و عاوزة تستعمليه و عندك شك ان كان بايظ ولا لاء 👇👇👇
هتجيبي البيضة و تجيبي كوباية ماية ساقعة مدوبة فيها معلقة ملح .. و حطي البيضة في الكوباية .. لو طفت على السطح .. تبقي باظت .. لو وقعت و سقطت تحت تبقي بنت حلال و اصيلة و لسة كويسة

💚💚💚

-لو عاوزه البطاطس  تعيش معاكى وقت طويل حطى معاها  تفاح.
💚💚💚

- وانتي بتطبخي البامية أو الفاصوليا الخضراء توطي النار خليها علي نار عاليه في الأول تغلي غلوتين وبعدين وطي النار عشان متسودش😀😀

💚💚💚

- لو بتسلقى بقوليات .. زي الفاصوليا البيضا و اللوبيا . كذلك سلق اللحمة و الفراخ 👇

متحطيش الملح إلا في الاخر خالص بعد ما الاكل يستوي .. لان لما بتحطي الملح .. مدة السلق بتطول اوووووي بعكس لما متحطيش الملح و تستني لما تستوي...

💚💚💚

- متحطيش ملح علي السلطه قبل الأكل بفترة كبيرة لأنه هيخلي الخضار يذبل وينزل مايتة حطية قبل الأكل علطول .

💚💚💚

-لما تيجي تقلي بطاطس لو عايزاها مقرمشه انقعيها في ميه وملح وخل قبل ماتعمليها بساعتين علي الاقل هتطلع مقرمشة وجميله .

💚💚💚

-كلنا عندنا مشكلة ان الخضرة والبقدونس بيدبلو و يبوظوا بسرعة في التلاجة

الحل👇👇👇👇
هو انك اول ما تيجي الخضرة .. اغسليها و نشفيها ,, و هاتى علبة متوسطة من علب التلاجة البلاستيك الي عندك .. و حطي في الارضية بتاعها ورق كلينيكس او ورق مناديل مطبخ السميكة دي ,, و حطي بعدها الخضرة او البقدونس .. و حطي بعد ما تخلصي وقبل ما تقفلى العلبه ورق فوق تاني غطي بيه باقي البقدونس .. كده هيعيش معاكي فترة اطول و يحتفظ بخضارة و ميصفرش ولا يبوظ.

💚💚💚

-الرز عشان يبقي مفرفر وميعجنش قلبيه في السمنه او الزيت كتير يتشوح افضلي قلبي فيه لحد ما كل حبة رز تتغلف بالمادة الدهنيه وبعدين ضيفي الميه والملح

-لو عاوزة تسلقى بيض و وانتي بتحطيها في الحلة اتشرخت شرخ بسيط 👇👇👇

حطي في ماية السلق معلقة خل او شوية ملح في ماية السلق .. و بكدة هتستوي جوا قشرتها ومش هتبوظ ولا حاجة.

💚💚💚

-لماتيجي تسلقي الفرخه ابشري بصله وحطي عليها ملح وفلفل اسود وادعكي بيهم الفرخه من بره وجوه وبعدين حطيها تتسلق هتلاقي طعمها تحححفه ومفيهاش ريحة زفارة.

💚💚💚

-لما تطبخي الخضار في شوربة أو ماية كتير خلي الكمية مناسبة لكمية الخضار عشان تحتفظي بفوائدها.

💚💚💚

-اوعى تغسلي الخضرة بعد ماتقطعيها لانها هتفقد نص الفيتامينات اللي جواها اغسليها الأول وبعدين قطعيها.

💚💚💚

-  متغطيش الحلة كلها وانتي بتطبخي لأن الخضار هيتاكسد ويغمق لونة.

💚💚💚

-وانتي بتطبخي خضار مجمد تحطيه في الحله علي النار علي طول لازم تحطيه في التلاجه شويه عشان ثلجه يذوب كده هتحافظي علي قيمة الغذائية اكتر.

💚💚💚

-اوعى تطبخي الخضار مع اللحمة عشان مستعجلة اسلقي اللحمة الأول وبعدين حطي الخضار عشان سوي اللحمة بيكون وقته اطول.

💚💚💚

-💦 لو قلقانه من الخضروات و الفواكة و انتي بتغسليها انها برضو مش نضيفة 👇👇👇

اتعودي دايما تجيبي الحلة او الطبق الي هتغسلى فيه الفاكهة و الخظار و حطي معلقة واحدة كبيرة خل في الماية الي هتنضفى بيها الخضار و الفاكهة .. الخل هيتقتل اي جراثيم ممكن متموتش بالغسيل العادي.💚💚